Këngëtarja Xhensila Myrtezaj ka reaguar pas intervistës së saj të fundit, e cila theu rekord shikueshmërie dhe ngjalli reagime të shumta në rrjetet sociale. Në një postim emocionues në Instagram, Xhensila falënderoi ndjekësit dhe admiruesit e saj për mbështetjen dhe fjalët e ngrohta që ka marrë pas transmetimit të intervistës.
Ajo shprehu se gjatë intervistës ndau një pjesë të realitetit të saj personal, duke përmendur se ajo nuk fliste vetëm për veten, por edhe për çdo grua që kishte nevojë të dëgjonte një histori të tillë. “Në këtë intervistë shpreha realitetin tim, për veten, por edhe për çdo grua që kishte nevojë ta dëgjonte,” shkruan Xhensila, duke theksuar se falë mbështetjes së publikut, ajo ka ndjerë se nuk është vetëm në këtë rrugëtim.
Këngëtarja gjithashtu i falënderoi dy moderatorët, Arbana Osmani dhe Eduart Grishaj, për ftesën dhe mundësinë që i dhanë për të prezantuar veten në një dritë të re, duke u shprehur se me këtë intervistë, ajo zbuloi aspekte të reja të personalitetit të saj, me të mirat dhe difektet që e karakterizojnë. “Askush nuk është perfekt, por jemi gjithmonë në kohë të përmirësohemi,” shtoi Xhensila.
Intervista e Xhensilës ka shkaktuar një valë reagimesh pozitive, duke bërë që shumë fansa dhe shikues të ndajnë mesazhe mbështetjeje dhe mirënjohje për guximin e saj në hapjen ndaj publikut.
