Një detaj i ri del në dritë nga atentati mafioz i ndodhur pasditen e së martës pranë aeroportit të Rinasit, ku mbeti i vrarë Gilmando Dani, i njohur si një nga figurat e botës së krimit, ndërsa u plagos rëndë Muçi Shaljani, agjent i Agjencisë së Mbikëqyrjes Policore.
Edhe pse nuk është e konfirmuar, mendohet se atentati mund të ishte planifikuar për t’u kryer shumë më herët, rreth orës 01:20 të mëngjesit, sapo fluturimi Wizz Air Malta nga Barcelona drejt Tiranës do të kishte mbërritur në aeroport.
Sipas të dhënave zyrtare të aeroportit, fluturimi nga Barcelona ishte planifikuar të mbërrinte në Tiranë në orën 01:20 të datës 11 nëntor, por u shty për më shumë se 13 orë, duke u ulur në 14:29 të pasdites së së njëjtës ditë.
Kjo vonesë, e cila në çdo rast mund të ishte dukur e zakonshme për pasagjerët, ndryshoi tërësisht dinamikën e ngjarjes dhe, siç dyshohet tashmë mund të ketë prishur planet e atentatorëve.
Sipas burimeve hetimore, Dani dhe Shaljani kishin udhëtuar së bashku drejt Barcelonës dhe po ktheheshin nga atje në momentin e sulmit. Për shkak të shtyrjes së fluturimit, të dy kanë qëndruar rreth 13 orë në pritje përpara se të niseshin drejt Tiranës.
Pikërisht kjo vonesë ka bërë që atentati të mos ndodhte në orët e para të mëngjesit, por në mesditë, pas daljes së tyre nga aeroporti, në një moment kur rrjedha e pasagjerëve dhe e automjeteve ishte shumë më e madhe.
Kësisoj mendohet se vonimi i fluturimit mund të ketë detyruar autorët të ndryshojnë skemën e ekzekutimit, duke pritur deri në momentin kur Dani dhe Shaljani dolën nga terminali.
Ngjarja mbetet një nga atentatet më të sofistikuara të viteve të fundit, si për shkak të profilit të viktimës, ashtu edhe për vendndodhjen, disa metra larg aeroportit ndërkombëtar të Tiranës. Policia dhe Prokuroria po hetojnë në disa pista, mes të cilave edhe mundësinë që atentatorët të kenë patur informacion të saktë mbi lëvizjet e viktimave dhe oraret e fluturimit.
