Mbrojtësi francez William Saliba ka firmosur kontratë të re afatgjatë me Arsenalin, që e mban në klub deri në verën e vitit 2030. 24-vjeçari ishte futur në dy vitet e fundit të kontratës aktuale, por tani ka zgjatur qëndrimin e tij në “Emirates”, duke iu bashkuar Gabriel Magalhaes dhe talenteve të akademisë Ethan Nwaneri e Myles Lewis-Skelly që kanë nënshkruar gjithashtu marrëveshje të reja.
“Jam krenar për veten sepse firmosa fillimisht në vitin 2019 dhe tani, në 2025, jam ende këtu për të rinovuar. Ndihem si në shtëpi. Kemi një skuadër të fortë, një staf të shkëlqyer dhe një trajner perfekt për mua, ndaj ky është vendi më i mirë ku mund të jem,” u shpreh Saliba pas firmës.
Ai shtoi se dëshiron të japë edhe më shumë për klubin dhe tifozët: “Mendoj se ende nuk kam arritur kulmin tim. Kam shumë gjëra për të përmirësuar dhe për të dhënë për këtë skuadër. E di që trajneri dhe stafi do të më ndihmojnë të bëhem një nga mbrojtësit më të mirë në botë dhe të fitojmë trofe.”
Saliba është kthyer në një prej mbrojtësve më të mirë të Premier League gjatë qëndrimit të tij në Arsenal. Ai luajti të gjitha 38 ndeshjet e kampionatit në sezonin 2023/24 dhe mungoi vetëm tre takime në edicionin e kaluar. Me këtë rinovim, Arsenali siguron një nga shtyllat kryesore të mbrojtjes për shumë vite.
