Presidenti i Serbisë, Aleksandër Vuçiç, u përball me një situatë të sikletshme gjatë një konference për media, ku tensionet me gazetarët arritën kulmin. Një pyetje që nuk e priti mirë, e shtyu presidentin të reagonte me tone të ashpra dhe kritike ndaj përfaqësuesve të mediave, përpara se të largohej i irrituar nga konferenca që transmetohej drejtpërdrejt.
Vuçiç po komentonte sulmin ndaj Milosh Pavloviç, një anëtar i lëvizjes “Studentët që duan të mësojnë”, duke e krahasuar me një rast tjetër të ndodhur më herët në Novi Sad, ku një studente ishte sulmuar dhe kishte pësuar thyerje të nofullës. Mediat në Beograd raportojnë se presidenti ngriti pyetje mbi standardet e drejtësisë në këto raste.
“Shpjegoni pse djemtë në Novi Sad qëndruan katër muaj në paraburgim, ndërsa ata që vepruan në mënyrë të organizuar, me qëllim dhe vetëdije, përballen vetëm me akuza për pakujdesi?”, deklaroi ai me nervozizëm.
Kur disa gazetarë tentuan të reagojnë dhe të japin komentet e tyre, Vuçiç i ndërpreu me tone të rrepta dhe i qortoi për qëndrimin e tyre.
“Ju ende mendoni se kjo është për të qeshur. Unë, jo. Mësohu të sillesh. Sjellje elementare. Nuk do të ishte keq,” tha ai i tensionuar.
Momenti u bë publik përmes rrjeteve sociale nga një gazetare e pranishme, e cila e përshkroi situatën si të pakëndshme, duke theksuar se presidenti ngriti zërin, u zemërua me gazetarët dhe e ndërpreu konferencën për shtyp.
