Vetëm pak ditë pasi mori pjesë në Samitin BE-së në Tiranë, ku u ul në tryezë me liderët evropianë dhe u prit nga Kryeministri Edi Rama, Presidenti i Serbisë, Aleksandër Vuçiç, zgjodhi një tjetër skenë për të dhënë një mesazh të ngarkuar simbolikisht.
Në një tubim të partisë së tij (SNS), ai i drejtoi një “urdhër” të koduar trajnerit të kombëtares serbe, Dragan Stojkoviç, për të mposhtur Shqipërinë në përballjen e 7 qershorit duke e rikthyer në qendër të vëmendjes një rivalitet të kahershëm, këtë herë përmes futbollit.
Gjatë fjalës së tij, Vuçiç falënderoi publikisht trajnerin Stojkoviç për mbështetjen politike, por deklarata që tërhoqi më shumë vëmendje kishte një ngjyrim të fortë sportivo-politik:
“E pashë pak më parë dhe tani e shoh që është këtu, ju lutem duartrokitni fort trajnerin serb Dragan Stojkoviç, një legjendë nga Nishi, i cili nuk u fsheh si shumë të tjerë dhe erdhi të jetë me ne. Në qershor luani kundër Shqipërisë, për t’i mposhtur ata!”, tha ai, me një ton që ngjante më shumë me një udhëzim, sesa me një urim sportiv.
Stojkoviç reagoi me një buzëqeshje, ndërsa kamerat u fokusuan tek ai. Deklarata vjen në prag të një ndeshjeje të ndjeshme mes Shqipërisë dhe Serbisë, një përballje që mbart gjithmonë tension për shkak të së kaluarës së ndërlikuar mes dy vendeve.
Mbetet për t’u parë se si do të jetë rezultati i ndeshjes së 7 qershorit!
