Dy punonjës të Komitetit Ndërkombëtar të Kryqit të Kuq humbën jetën të shtunën si pasojë e një sulmi në banesën e tyre në Khan Younis, në jug të Rripit të Gazës, njoftoi organizata humanitare.
“Jemi thellësisht të tronditur nga humbja e dy kolegëve tanë të dashur, Ibrahim Eid dhe Ahmad Abu Hilal. Përsërisim me urgjencë thirrjen për mbrojtjen dhe respektimin e civilëve në Gaza,” thuhet në deklaratën e Kryqit të Kuq.
Pavarësisht një armëpushimi dy mujor, Izraeli rifilloi ofensivën ushtarake në mesin e marsit dhe prej 17 majit e ka intensifikuar më tej, duke synuar shkatërrimin e Hamasit, lirimin e pengjeve të mbetura dhe marrjen e kontrollit të plotë mbi territorin.
Nga 251 pengjet e kapura nga Hamasi më 7 tetor 2023, ende 57 ndodhen në Gaza. Sipas autoriteteve izraelite, të paktën 34 prej tyre mendohet se kanë humbur jetën.
Sipas të dhënave të Ministrisë së Shëndetësisë të drejtuar nga Hamasi – të cilat janë konsideruar të besueshme nga Kombet e Bashkuara – mbi 53,930 persona, kryesisht civilë, janë vrarë në Rripin e Gazës.
