Policia e Pogradecit ka arrestuar Ilirjan Selmanin, i dyshuar për vrasjen e 52-vjeçares Kozeta Teço, me të cilën kishte pasur një lidhje intime.
Ngjarja e rëndë ndodhi brenda banesës së viktimës, ku pas një konflikti të çastit, Selmani e goditi atë me thikë dhe më pas tentoi të zhdukte gjurmët e krimit duke i vënë flakën trupit të saj.
Autori u kap disa orë pas ngjarjes, pasi u identifikua nga kamerat e sigurisë në zonën përreth. Gjatë marrjes në pyetje nga policia, ai ka pranuar autorësinë e krimit dhe ka rrëfyer për marrëdhënien që kishte pasur me viktimën.
“E doja, nuk më bënte përshtypje mosha. Vij nga një familje e mirë dhe nuk mund të bëhem vrasës. Ajo shpesh dehej dhe më godiste, por e duroja sepse e doja. Pastaj nuk durova dot më”, tha ai gjatë në polici.
Hetimet vijojnë për të zbardhur rrethanat e plota të kësaj ngjarjeje tronditëse, ndërsa pritet që Selmani të dalë përpara gjykatës për caktimin e masës së sigurisë.
Çifti kishte një lidhje intime prej tre vitesh, por sipas autorit, kohët e fundit marrëdhënia e tyre ishte përkeqësuar, pasi Kozeta Teço vuante nga probleme të shëndetit mendor dhe shpesh ushtronte dhunë ndaj tij.
Policia ka nisur hetimet për zbardhjen e plotë të rrethanave të ngjarjes, ndërsa 31-vjeçari pritet të përballet me akuzën e vrasjes me paramendim dhe fshehjes së provave.
