Tiranë – Edhe pse i është dhënë masa e sigurisë që të premten, Mario Përlleshaj, i mituri i dyshuar si autor i ngjarjes është ende në spitalin privat.
Ditën e nesërme, në mëngjes do të mblidhet një komision i posaçëm, në përbërje të të cilit do të jenë mjekë dhe policia e burgjeve të cilët do të vendosin si do të vijohet më tej.
Komisioni i Drejtorisë së Burgjeve do të mblidhet për të vendosur transferimin në spitalin e burgut ose në burgun e të miturve në Kavajë, në varësi të gjendjes së tij shëndetësore.
I mituri akuzohet se vrau Martin Canin, 14 vjeç shok në klasën paralele të shkollës “Fan Noli” në Tiranë më 18 nëntor, pak metra larg shkollës.
Në sherr mbeti i plagosur dhe shoku i Martinit, Luisim 15 vjeç i cili ndodhet në spital ndërsa një djalë i katërt është i përfshirë në sherr.
Në një intervistë televizive babai i Luisit akuzon këtë të fundit, të identifikuar me inicialet K.B se ka qenë ai që e ka qëlluar djalin e vet. Vetë policia e ka marrë në pyetje të miturin por nuk është arrestuar.
Për 14 vjeçarin e arrestuar si autor të vrasjes së Martin Canit, Gjykata e Tiranës caktoi të premten, 22 nëntor, masën e sigurisë arrest me burg.
