Një gjykatë në Leipzig të Gjermanisë ka shpallur të pafajshëm një 52-vjeçar shqiptar, i cili akuzohej për vrasjen e një tjetër shqiptari, pas një konflikti që ndodhi më 13 korrik të vitit 2024. Sipas aktakuzës, 52-vjeçari kishte goditur me thikë 29-vjeçarin shqiptar në zemër pas një sherri të ndodhur pranë një lokali në Leipzig, ku viktima ndërroi jetë gjatë natës, pasi ishte transportuar në spital.
Në seancën e gjykatës, prokuroria kishte kërkuar dënim prej 7 vitesh burg për 52-vjeçarin, duke e akuzuar për vrasje të parashikuar. Megjithatë, gjykata rajonale e Leipzigut ka marrë një vendim të papritur, duke konkluduar se goditja me thikë mund të ketë qenë akt i vetëmbrojtjes. Sipas këtij konstatimi, gjykata vendosi të shpallë të pafajshëm të pandehurin dhe e liroi atë nga akuzat për vrasje.
Mediet gjermane raportojnë se gjykata arriti në përfundimin se veprimi i 52-vjeçarit ka qenë një reagim ndaj një kërcënimi nga viktima, duke marrë parasysh situatën e tensionuar në momentin e ngjarjes.
Për shkak të vendimit, 52-vjeçari do të dëmshpërblehet për kohën që ka kaluar në paraburgim deri në shpalljen e vendimit përfundimtar, dhe do të kthehet në liri. Ky rast ka ngjallur reagime të ndryshme, duke pasur parasysh pasojat tragjike të ngjarjes dhe vendimin e gjykatës që shpalli të pafajshëm të akuzuarin.
