Kozma Papa, 22-vjeçari që jetonte jashtë Londrës, vrau me thikë bashkatdhetarin e tij Bledi Petraj, 37 vjeç, më 4 shkurt të këtij viti në zonën Southgate të Londrës verilindore.
Gjatë gjyqit, gjykatës iu tha që të dy burrat njiheshin më parë me njëri-tjetrin dhe ata ishin përfshirë në një përleshje në një kafene më herët atë ditë. Të dy më pas shkuan në rrugën “Queen Elizabeth” afërsisht 45 minuta më vonë, secili me thika të mëdha.
Të dy, sipas prokurorit të çështjes, kanë goditur me grusht njëri-tjetrin, derisa viktima Bledi Petraj ka humbur kontrollin e thikës dhe vrasësi Kozma Papa ka kapur thikën dhe me dy thika në duar, pasi viktima ishte rrëzuar në tokë e ka goditur viktimën 13 herë pa ndërprerje.
Ndonëse u gjet i gjallë nga ambulanca, ai nuk mundi të shpëtonte dhe ndërroi jetë pak orë më vonë në spital pasditen e 4 shkurtit të këtij viti.Për këtë krim Kozma Papa u dënua me burgim të përjetshëm. Por Gjykata Qendrore e Magjistraturës në Londër po kërkon që Papa të kryejë një minimum prej 20 vitesh burg.
Autori i vrasjes u kap nga policia teksa po largohej jashtë Londrës dhe pranoi se e kishte kryer vrasjen.
Ka pasur dhjetëra raste të vrasjeve të shqiptarëve ndër vite në Britani, për arsye që variojnë nga pazaret e dështuara të drogës e deri te motive të dobëta.
Por hetuesit e Policisë Metropolitane për këtë rast nuk saktësojnë shkakun dhe motivin e vërtetë që ka çuar në përplasjen fizike me pasojë humbjen e jetës së 37-vjeçarit Bledi Petraj, banues në Londër
