Policia e Elbasanit ka reaguar pas ngjarjes së rëndë të ndodhur mbrëmjen e sotme, ku një biznesmen 43-vjeçar u gjet i ekzekutuar me armë zjarri brenda automjetit të tij në lagjen “Emin Matraxhiu”.
Sipas informacionit paraprak, rreth orës 20:35, u njoftua se brenda automjetit ndodhej trupi i pajetë i shtetasit Mondi Mëhalla, i njohur edhe me identitetin E. H., 43 vjeç. Menjëherë pas sinjalizimit, forcat e Policisë mbërritën në vendngjarje dhe nisën veprimet e para hetimore.
Burime zyrtare bëjnë me dije se janë ngritur pika kontrolli në të gjitha daljet e qytetit, ndërsa vijojnë kontrollet masive në zona të ndryshme dhe në ambiente të dyshuara, me qëllim kapjen e autorit ose autorëve të vrasjes.
Ndërkohë, është ngritur një grup i posaçëm hetimor, i cili, nën drejtimin e Prokurorisë, po punon për sqarimin e plotë të rrethanave të krimit, identifikimin e autorëve dhe dokumentimin ligjor të kësaj ngjarjeje.
