Drejtori i Drejtorisë Vendore të Policisë Dibër, Artion Duka, në një konferencë për shtyp të mbajtur ditën e sotme, dha detaje në lidhje me operacionin policor të koduar “Bashkëfajësia”, që çoi në zbardhjen e vrasjes së 23-vjeçarit Renis Dobra. Trupi i pajetë i të riut u gjet më 9 korrik pranë liqenit të Ulzës, pas denoncimit të babait të tij për zhdukjen e djalit.
Operacioni, i finalizuar pas një hetimi njëjavor, u drejtua nga Prokuroria pranë Gjykatës së Shkallës së Parë të Juridiksionit të Përgjithshëm Dibër dhe u mbështet nga strukturat më të specializuara të Policisë së Shtetit, përfshirë Forcën e Posaçme Operacionale dhe Drejtorinë për Hetimin e Krimeve të Rënda. Hetimet u zhvilluan përmes metodave speciale dhe analizës së pamjeve filmike, provave të mbledhura nga vendngjarja dhe të dhënave operative.
Si rezultat, u arrestuan dy nga autorët e dyshuar të ngjarjes Petrit Çakrri, 55 vjeç, banues në Tropojë. Ai u ndalua në fshatin Golaj të Kukësit.
Gjithashtu u arrestua shtetasi Fatjon Bushgjoka, 34 vjeç, banues në Kamzë. Ndalimi i tij u bë në zonën e Astirit në Tiranë.
Të dy të dyshuarit akuzohen për “vrasje me paramendim, kryer në bashkëpunim” dhe “rrëmbim dhe mbajtje peng të personit”.
Në kërkim janë shpallur vëllezërit e Fatjon Bushkogjës, Kristi dhe Aleksandër Bushgjoka.
Sipas deklaratës zyrtare, më datë 8 korrik, në orët e mbrëmjes, viktima u rrëmbye në fshatin Zenisht të Burrelit dhe më pas u vra nëpërmjet mbytjes me litar.
Autorët hodhën trupin e pajetë dhe automjetin e viktimës në drejtim të liqenit të Ulzës, duke tentuar të inskenojnë një aksident. Gjatë rënies, trupi mbeti jashtë liqenit, ndërsa automjeti përfundoi në ujë dhe u gjet nga autoritetet.
Hetimet zbuluan se viktima, me precedent penal për shpërndarje droge në Gjermani, dyshohet të ketë pasur konflikte me autorët lidhur me veprimtari kriminale në fushën e narkotikëve.
Gjatë fazës hetimore, u sekuestruan:
20 celularë,
7 automjete,
një sasi eurosh,
lëndë narkotike (kokainë),
si dhe prova të tjera që do i shërbejnë hetimeve në vijim.
Duka theksoi se autorët nuk kanë qenë të veshur me uniforma policie si dhe nuk kane përdorur asnjë logo apo automjet te Policisë.
Policia ka shoqëruar edhe 4 persona të tjerë në Komisariatin nr. 6 në Tiranë, për të cilët po kryhen hetime për të individualizuar rolin dhe përgjegjësinë e mundshme në këtë ngjarje kriminale.
