Gjykata e Apelit në Kosovë ka lënë në fuqi dënimin me burgim të përjetshëm për Dardan Krivaçën, i shpallur fajtor për vrasjen e Marigona Osmanit, 18-vjeçarja që u vra më 22 gusht 2021 në Ferizaj. Po ashtu, Apeli ka vërtetuar dënimin me 15 vjet burg për Arbër Sejdiun, i akuzuar për ndihmë në vrasje.
Ngjarja ka filluar me një dënim fillestar në gusht të 2023, por Apeli vendosi rigjykim pas disa ankesave. Pas shqyrtimit të provave, Apeli e ka konsideruar aktgjykimin si të drejtë, duke hedhur poshtë të gjitha ankesat dhe duke mbajtur në fuqi dënimet për të dy të akuzuarit.
“Sa i përket pretendimeve ankimore lidhur me vërtetimin e gabuar dhe jo të plotë të gjendjes faktike, kolegji gjykues konstaton se gjykata e shkallës së parë e ka vërtetuar në mënyrë të drejtë dhe të plotë gjendjen faktike, për shkak se me provat e administruara gjatë shqyrtimit gjyqësor është vërtetuar se të akuzuarit D.K. dhe A.S., kanë kryer veprat penale të lartcekura, për të cilat janë shpallur fajtorë”, u tha në njoftimin e Gjykatës së Apelit.
