Mbrëmjen e së mërkurës, 34-vjeçari Kristian Kola u qëllua për vdekje në qendër të Shkodrës. Hetimet tregojnë se atentatin e kryen dy persona, të cilët lëviznin me motor dhe qëlluan në drejtim të tij me një armë gjysmë silenciator, duke lënë të riun të vdekur në vend.
Nga rindërtimi i ngjarjes rezulton se qitësi ishte profesionist, pa gabuar shënjestrën, ndërsa lëvizjet e tyre tregojnë për një plan të studiuar.
Dita e ngjarjes tregoi se viktima ndiqte të njëjtin itinerar si çdo mbrëmje, duke pirë kafe në të njëjtin lokal dhe në të njëjtin orar. Pamjet e kamerave të sigurisë tregojnë se autorët, të maskuar me skafandër, humbën gjurmët pranë stacionit të trenit.
Motivet e vrasjes mbeten të paqarta. Pista e parë lidhej me një konflikt të 34-vjeçarit rreth një viti e gjysmë më parë, por pas verifikimeve ajo u hodh poshtë. As konfliktet e mundshme për biznes nuk kanë rezultuar si pistë e fortë. Policia po kërkon bashkëpunimin e familjarëve për të zbardhur të shkuarën e Kristian Kolës, por ata kanë zgjedhur të heshtin.
