Vrasja e Eduart Reçit/ Policia kthehet në vendin e krimit! Bën prova për të zbuluar vendin dhe pozicionin nga kanë qëlluar autorët

Tirane- Policia e Tiranës ka kryer disa prova mbrëmjen e së premtes në vendin ku u ekzekutua Eduart Reçi. Eksperimenti është bërë me qëllim për të zbuluar vendin dhe pozicionin që autorët kanë përdorur në momentin kur kanë qëlluar me një plumb në kokë 52-vjeçarin.

Fillimisht grupi hetimor kishte dyshime se biznesmeni ishte qëlluar nga taraca e një ndërtese aty pranë, por nga provat dyshohet se autori ka qënë në lartësi më të ulët, por jo në taracë, ndoshta në një prej kateve. Dyshohet se ka qenë në një pallat me ngjyrë të kuqe në afërsi, i pozicionuar.

Gjatë ditës së shtunë (16 nentor) pritet që policia kriminale të kryejë sërish eksperimente të tjera, pasi ka akoma paqartësi. Arma e përdorur në vrasje është pistoletë sportive e llojeve të reja, ndërsa po pritet ekspertiza e predhës për ta vërtetuar.

52-vjeçari u qëllua me plumb në kokë mbrëmjen e 13 nëntorit.

Ai u dërgu me urgjencë në spitalin e Traumës dhe humbi jetën mëngjesin e nesërm, më 14 nëntor.

Grupi hetimor që po heton vrasjen e biznesmenit ka sekuestruar kamerat e sigurisë.

Mësohet se pamjet e sigurisë nuk kanë filmuar autorin ose autorët për shkak të errësirës.

Në pyetje janë marrë familjarët e tij, të cilët kanë mohuar që të kenë dijeni për konflikte të Reçit me persona të tjerë. Ndërkohë në vendngjarje nuk është gjetur asnjë gëzhojë.

Eduart Reçi prej disa vitesh merrej me firmën e tij të ndërtimit, ndërkohë më herët ka qënë drejtor në institucionin e SHISH.