Një ngjarje e rëndë ka tronditur komunitetin e Finikoundës, pas vrasjes së dyfishtë të ndodhur më 5 tetor në një kamping të njohur në zonë. Autoritetet greke kanë arrestuar autorin e dyshuar në shtëpinë e tij në Kallithea, ndërkohë që ai ka mohuar çdo përfshirje në krim.
Sipas burimeve, ai dhe bashkëpunëtori i tij jetojnë pranë Kallitheas, duke ngritur dyshime për një plan të koordinuar.
Të martën në mëngjes, miku i autorit, një 22-vjeçar, iu dorëzua vullnetarisht Byrosë Greke Kundër Korrupsionit, i shoqëruar nga avokati i tij, Charalambos Lykoudis. Ky i fundit deklaroi se klienti i tij nuk kishte motiv financiar dhe se nuk ekziston asnjë lidhje familjare me viktimën.
Sipas avokatit, i riu kishte një “marrëdhënie personale dhe të dhimbshme” me pronarin e kampingut, të cilin e akuzon për ngacmim seksual gjatë verës së vitit 2022.
Lykoudis sqaroi se qëllimi i dy personave që ndodheshin në motoçikletë nuk ishte vrasja, por frikësimi dhe zhvatja e parave. Ai tha se klienti i tij kishte përdorur një pistoletë ajrore për të trembur pronarin pak para ngjarjes, veprim që i riu e ka pranuar para autoriteteve.
Ai është fëmija me pantallona të shkurtra në sediljen e pasme,” tha avokati, duke përshkruar rolin pasiv të klientit të tij në ngjarje.
Sipas hetimeve, vrasja ndodhi në recepsionin e kampingut, ku ndodheshin pronari 68-vjeçar, kujdestari i tij 60-vjeçar dhe një mik i vjetër. Autori, me fytyrën e mbuluar, hyri me forcë dhe qëlloi me gjakftohtësi pronarin, duke e lënë të vdekur.
Më pas, vrau mikun e tij, i cili tentoi të arratisej. Në vendngjarje ndodhej edhe nipi i pronarit, i cili arriti të shpëtojë.
Ngjarja ka hapur një hetim të gjerë mbi motivet e vrasjes, përfshirjen e të rinjve dhe rolin e marrëdhënieve personale në krime të tilla. Autoritetet greke po vijojnë hetimet për të zbardhur tërësisht dinamikën dhe përgjegjësitë e secilit person të përfshirë.
