Policia e Durrësit ka arrestuar autorin e dyshuar të vrasjes së Valbon Beqirit, 51 vjeç, ngjarje e ndodhur mbrëmjen e kaluar në një banesë në lagjen nr. 12 të qytetit bregdetar.
Sipas burimeve nga grupi hetimor, ngjarja ka ndodhur në banesën e hallës së viktimës, e cila dyshohet se përdorej si vend ku shpërndahej dhe konsumohej lëndë narkotike nga persona të ndryshëm, përfshirë edhe viktimën.
Mbrëmë, nën efektin e drogës, ka nisur një konflikt mes Beqirit dhe një personi tjetër. Përplasja mes tyre ka përfunduar tragjikisht, me vrasjen e 51-vjeçarit.
Që mbrëmjen e djeshme, policia ka shoqëruar disa persona, ndërsa mësohet se njëri prej tyre është identifikuar si autor i dyshuar i krimit.
Drejtoria Vendore e Policisë në Durrës pritet të bëjë publike së shpejti identitetin e autorit dhe detaje të tjera nga hetimet.
