Erin Patterson, 50-vjeçare nga Australia, është dënuar me tre burgime të përjetshme dhe 33 vjet pa të drejtë lirimi me kusht për helmimin me qëllim të tre anëtarëve të familjes së ish-bashkëshortit të saj gjatë një dreke në shtëpi. Ngjarja ndodhi në korrik 2023 në qytetin Leongatha dhe është bërë lajm i njohur në Australi dhe në botë, duke tërhequr vëmendjen e mediave, podcasteve dhe dokumentarëve.
Viktimat ishin prindërit e Simon Patterson, Don dhe Gail, si dhe tezja e tij, Heather Wilkinson. Të tre ata ndërruan jetë pas disa ditësh pasi konsumuan kërpudha “death cap”, ndër më helmuese në botë. Vetëm bashkëshorti i Heather, pastor Ian Wilkinson, mbijetoi, duke kaluar javë të tëra në gjendje kritike.
Gjatë gjykimit, u zbulua se Erin kishte vepruar me paramendim, duke mbledhur kërpudhat pranë shtëpisë së saj dhe duke i shpallur si të blera në supermarket. Ajo gjithashtu gënjeu autoritetet duke pretenduar se kishte ngrënë të njëjtin ushqim me fëmijët e saj. Gjyqtari Christopher Beale e përshkroi veprimin e saj si një “tradhti të jashtëzakonshme” dhe theksoi se Patterson kishte krijuar një “skenar të ndërlikuar” për t’i fshehur krimet e saj.
Gjyqtari vuri në dukje se pati një plan të mirëorganizuar për drekën, që përjashtonte fëmijët e saj dhe ishte një tentativë për të realizuar vrasjen e katërfishtë. Prokuroria nuk ofroi një motiv të qartë, por theksoi se Erin kishte dyfytyrësi, duke u shfaqur e sjellshme në publik ndërsa shfaqte armiqësi në mesazhet e saj private në Facebook.
Duke iu drejtuar seancës së dënimit, pastor Ian shprehu mirënjohjen e tij për mbështetje dhe theksoi se nuk ishte më viktimë e Erin Patterson, por se ajo kishte bërë vetë viktimën e mirësisë së tij. Patterson ka afat deri më 6 tetor për të apeluar vendimin, por për momentin do të vuajë një dënim të rreptë.
