Një 27-vjeçar është arrestuar nga policia e Shijakut, pasi dyshohet se ka vjedhur një shumë parash dhe sende të ndryshme në një lokal në fshatin Shahinaj.
Sipas njoftimit zyrtar, arrestimi u bë pas kallëzimit të pronarit të lokalit për një vjedhje të ndodhur gjatë natës. Pas veprimeve hetimore, policia identifikoi dhe arrestoi në flagrancë shtetasin S. D., 27 vjeç, banues në Shijak.
Nga hetimet paraprake dyshohet se i riu ka vjedhur para, pije alkoolike dhe cigare, ndërsa policia po verifikon përfshirjen e tij edhe në disa raste të tjera vjedhjesh të ndodhura më parë.
“Vodhi gjatë natës një shumë parash dhe disa sende në një lokal në Shijak, brenda pak orësh identifikohet, kapet dhe vihet në pranga 27-vjeçari, i dyshuar si autor i vjedhjes.
27 vjeçari, dyshohet dhe si autor i disa vjedhjeve të tjera të ndodhura më parë.
Specialistët për Hetimin e Krimeve të Komisariatit të Policisë Shijak, menjëherë pas marrjes së kallëzimit për një rast vjedhjeje në një lokal në fshatin Shahinaj, organizuan punën për identifikimin, kapjen dhe vënien në pranga të autorit të këtij rasti”, njoftoi policia.
