31-vjeçari Emanuel Brahimi është vendosur në prangat e policisë së Vlorës dhe dy të tjerë janë shpallur në kërkim pasi akuzohen se kanë vjedhur tre banesa dhe një makinë në fshatin Fitore, Novoselë. Mësohet se në kërkim janë shpallur Gentian Silaj 28-vjeç, dhe Masimiljano Zenunaj, 30-vjeç. Materialet procedurale i kaluan Prokurorisë Vlorë, për veprime të mëtejshme hetimore.
Njoftimi:
DVP Vlorë/Vijojnë goditjet e njëpasnjëshme kundër krimeve ndaj pronës, vihet në pranga një shtetas dhe shpallen në kërkim 2 bashkëautore të dyshuara, për tre vjedhje banesash dhe një automjeti, në fshatin Fitore
Në vijim të punës për zbardhjen e vjedhjeve të ndodhura më herët, dhe falë veprimeve të mirëorganizuara hetimore të shërbimeve të Komisariatit të Policisë Vlorë, u bë i mundur dokumentimi i tre rasteve të vjedhjes, në fshatin Fitore, Novoselë, ndalimi me iniciativë i njërit prej autorëve të dyshuar, si dhe shpallja në kërkim e dy të tjerëve, konkretisht:
U ndalua shtetasi:
• E. B., 31 vjeç, banues në Fitore.
Ndërsa u shpallën në kërkim shtetasit:
• G. S., 28 vjeç, dhe M. Z., 30 vjeç, banues në Fitore.
Nga hetimet dyshohet se këta shtetas, në orët e para të mëngjesit të datës 17.03.2025, kanë vjedhur në dy banesa të shtetasve që aktualisht jetojnë jashtë vendit, si dhe në banesën e një shtetasi tjetër, nga ku kanë marrë edhe një automjet të markës “Land Rover”, i cili është gjetur dhe sekuestruar në cilësinë e provës materiale.
Vijon puna për lokalizimin dhe kapjen e shtetasve të shpallur në kërkim, si dhe për dokumentimin e rasteve të tjera ku këta shtetas dyshohen se janë autorë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme hetimore.
