Kryeministri dhe njëkohësisht kryesocialisti Edi Rama po zhvillon këtë të enjte takimin përmbyllës në qytetin e Vlorës, në kuadër të fushatës elektorale.
Në fjalën e tij, Rama tregoi arritjet e PS-së në qarkun e Vlorës. Ai gjithashtu nënvizoi investimet që do të bëjnë me mandatin e katërt, duke kërkuar kështu votën e qytetarëve.
Rama u shpreh se Vlora do të ketë një nga portet më të bukura, si dhe shtoi që bregdeti i Vlorës do të jetë një nga destinacionet më të kërkuara të Mesdheut.
Rama: Vlora do të ketë një nga portet më të bukura. Do të ketë një port për të gjitha anijet e peshkimit dhe anijet që sjellin mallrat. Në këto 5 vite, Vlora do të bëhet territor ku do të vijnë firmat më prestigjioze të hotelerisë. Turistë nga e gjithë bota me vështirësi do të gjejnë vend, pasi ju siguroj që bregdeti i Vlorës do të bëhet një nga destinacionet më të kërkuara të Mesdheut. Ju e mbani mend mirë si ishte Vlora. Këtu të gjithë kalonin për të ikur në anën tjetër, por Lungomare nuk ekzistonte. Rruga ishte vetëm rrugë njëkalimshe. Shumë shpejt, gjithë kjo Lungomare që tani është bërë me nam, do të ketë një konkurente në anën tjetër, në Radhimë. Gjithë bregu i Vlorës do të ketë rrugën e vet, trotuarin e këmbësorëve. Ky qark nuk është vetëm deti, por edhe territoret brenda, ku ka filluar të zgjohet një jetë e re me turizëm dhe agroturizëm. Agroturizmi do të vazhdojë të zhvillohet. Të gjitha këto janë pjesë e asaj që ne do të bëjmë së bashku.
