Eintracht Frankfurt po kërkon trajner të ri pas shkarkimit të Dino Toppmöller dhe, sipas mediave gjermane, emri që po merret seriozisht është ai i Xabi Alonsos. Pavarësisht një periudhe jo ideale te Real Madrid, reputacioni i trajnerit spanjoll në Gjermani mbetet shumë i lartë, falë suksesit të tij te Bayer Leverkusen.
Sipas Bild, drejtori sportiv Markus Krösche e sheh Alonson si një opsion të nivelit të lartë dhe raportohet se po shtyn për një takim, për të diskutuar mundësinë e një marrëveshjeje.
Vendimi për ndryshim në stol erdhi pas barazimit 3-3 ndaj Werder Bremen dhe një serie rezultatesh shqetësuese. Me 39 gola të pësuar në 18 ndeshje, mbrojtja e Frankfurtit është ndër më të brishtat në Bundesligë, faktor që dyshohet se ndikoi fort në vendimin e klubit. Aktualisht, ekipi ndodhet në vendin e 7-të në kampionat.
Frankfurti po shqyrton edhe alternativa të tjera si Edin Terzić, Marco Rose dhe Roger Schmidt, por objektivi kryesor mbetet bindja e Alonsos për t’u rikthyer në Gjermani.
Megjithatë, operacioni nuk duket i lehtë. Alonso ka qenë më parë në radarët e klubeve të mëdha, përfshirë Bayern Munich, dhe një lëvizje drejt Eintracht mund të shihet si hap mbrapa në karrierë, përveçse do të kërkonte edhe investim të konsiderueshëm.
Në sfond, përmendet edhe mundësia që Alonso të shfaqet si opsion për Liverpoolin, në rast se rezultatet e dobëta vazhdojnë. Për momentin, një gjë është e qartë: emri i Xabi Alonsos vazhdon të tërheqë interes nga klubet e mëdha dhe merkatoja e trajnerëve sapo është ndezur.
