Duke filluar nga viti i ardhshëm, çmimet e sigurimit të detyrueshëm të mjeteve në Shqipëri do të ndryshojnë, duke u bërë të diferencuara në bazë të disa faktorëve, përfshirë vjetërsinë e mjetit dhe historikun e aksidenteve të shoferëve. Kjo reformë është pjesë e një projekti të miratuar nga Autoriteti i Mbikëqyrjes Financiare.
Në një intervistë për Euronews Tonight, gazetari Neritan Gjergo theksoi se tarifat e reja do të ndikohen nga faktorë të shumtë. “Fuqia motorike, mosha e të siguruarit dhe përvoja në drejtimin e mjetit do të jenë disa nga elementët e rëndësishëm që do të ndikojnë në çmimin e sigurimit,” shpjegoi Gjergo. Ai gjithashtu shtoi se drejtuesit e rinj do të paguajnë më shumë gjatë dy viteve të para, si dhe shoferët që marrin lejen e drejtimit në moshë më të madhe.
Sa i përket historikut të dëmeve, Gjergo sqaroi se tani çdo dëm i raportuar do të ndikojë në çmimin e sigurimit. “Për çdo dëm të raportuar gjatë vitit, çmimi do të shumëzohet me një koeficient. Nëse nuk ka dëme, çmimi do të ulet me 0.95, ndërsa një dëm i raportuar do të rrisë çmimin me 1.25,” tha ai.
Këto rregulla janë një zhvillim i rëndësishëm për industrinë e sigurimeve, pasi vitin e kaluar kompanitë mblodhën 141 milion euro nga sigurimi motorik, ndërsa paguan 49 milion euro për dëmet e shkaktuara. Reformimi i çmimeve të sigurimeve pritet të sjellë një transparencë më të madhe dhe të ndihmojë në uljen e riskut në tregun e sigurimeve.
