Cristiano Ronaldo dhe Georgina Rodríguez kanë shtuar edhe një tjetër pasuri luksoze në “koleksionin” e tyre të pronave. Sipas raportimeve, çifti ka përfunduar një vilë të re ekskluzive në Portugali, me vlerë rreth 25 milionë euro, e cila tashmë është gati për t’u banuar.
Po ashtu, thuhet se Ronaldo i ka propozuar martesë Georgina-s më 10 gusht të vitit të kaluar dhe këtë vit pritet të festojnë dasmën e tyre. Më herët, CR7 i kishte thënë Piers Morgan se ceremonia do të zhvillohej pas Kupës së Botës 2026, ndërsa Georgina ka lënë të kuptohet se, pavarësisht famës së tij, dasma do të jetë e vogël dhe private. Raportohet se mund të mbahet në Madeira, vendlindja e Ronaldos.
Ndërkohë, vila e re ka marrë vëmendje të madhe për luksin ekstrem. Ajo ndodhet në zonën Quinta da Marinha në Cascais dhe është cilësuar si një nga pronat më të shtrenjta në vend. Sipas revistës spanjolle Semana, prona shtrihet në 12,000 m², ku rreth 5,000 m² janë hapësirë e banueshme. Vila ndodhet rreth 200 metra nga Oqeani Atlantik dhe është e rrethuar nga fusha golfi, qendra hipizmi dhe ambiente rekreative.
Shtëpia ka pishinë të jashtme dhe të brendshme, palestër private, kinema me dhjetëra vende, si edhe një garazh për deri në 20 makina, për të akomoduar koleksionin e automjeteve luksoze të CR7.
Brenda, vila thuhet se ka detaje me mermer italian, rubineta me ar të pastër, si dhe një mural Louis Vuitton i dizajnuar posaçërisht për Ronaldon dhe Georgina-n. Raportohet se punimet e rinovimit kishin nisur në 2020 dhe tani janë përfunduar.
Kjo pritet të jetë edhe “projekti” më ambicioz i çiftit, pasi vila mendohet të shërbejë si shtëpia ku do të vendosen kur Ronaldo të vendosë t’i japë fund karrierës dhe të dalë në pension nga futbolli.
