Viktor Gyökeres nuk e ka pasur të lehtë fillimin e aventurës së tij te Arsenali. Transferimi i zgjatur gjatë verës e la pas me stërvitjet, dhe dëmtimi i Kai Havertz në ndeshjen e parë të sezonit e detyroi suedezin të mbante i vetëm peshën e sulmit për muaj të tërë.
Gyökeres ishte titullar në 13 nga 15 ndeshjet e para të Arsenalit dhe, pikërisht kur filloi të gjente ritmin, ai pësoi një dëmtim në muskul pas të cilit u rikthye me vështirësi. Edhe pse kishte nisur të bindte kritikët me paraqitjen kundër Burnley-t, tani dyshimet janë rikthyer.
Pas rikuperimit, ai nuk ka shënuar në katër ndeshjet e tij të fundit dhe u duk i humbur në sfidën ndaj Club Brugge. Suedezi kompletoi vetëm katër pasime dhe pati një goditje në portë përpara se të zëvendësohej pas një ore lojë.
Krahasimi ishte i pashmangshëm: Gabriel Jesus, në 30 minutat si zëvendësues në ndeshjen e tij të parë pas 11 muajsh mungesë, kompletoi 14 pasime, pati dy goditje në portë dhe goditi traversën. Forma e brazilianit ka shtuar presion mbi Gyökeres, por Arteta është i bindur se 26-vjeçari do të shpërthejë së shpejti.
“Mendoj se ishte në një moment shumë të mirë para dëmtimit. I desh pak kohë të përshtatej sepse është një ligë tjetër, kërkesa tjetër. Pa përgatitje verore është e vështirë. Tani po gjen ritmin dhe golat do të vijnë,” tha Arteta.
Kur duhet ta përdorë Arteta Gyökeresin?
Ndeshja ndaj Wolves duket perfekte. Të fundit në renditje dhe pa fitore këtë sezon, Wolves është lloji i kundërshtarit ndaj të cilit Gyökeres zakonisht shkëlqen. Të pesë golat e tij në Premier League kanë ardhur kundër skuadrave në pesëshen e fundit të tabelës — një tregues se suedezi mund të jetë arma ideale kundër kundërshtarëve më të dobët.
Në të kaluarën, Arsenali ka vuajtur pikërisht këto ndeshje: sezonin e kaluar humbi 18 pikë në shtëpi dhe 14 prej tyre ishin kundër ekipeve jashtë zonave europiane. Gyökeres mund ta ndryshojë këtë model.
Konkurrencë e vërtetë për sulmin e Arsenalit
Dinamika ka ndryshuar. Në fillim të sezonit, Gyökeres ishte i vetmi opsion si numër 9. Tani Arteta ka në dispozicion Jesus, Gyökeres, së shpejti Havertz dhe gjithashtu Merinon. Të katërt janë sulmues me profile krejt të ndryshme, çka i jep Artetës mundësinë të zgjedhë sipas llojit të ndeshjes.
Realiteti është se suedezi ndoshta nuk do të jetë më protagonist i padiskutueshëm siç u mendua fillimisht, por do të ketë një rol të rëndësishëm dhe të përshtatur brenda sistemit të Artetës — dhe nuk ka asgjë të keqe në këtë.
