Një sulm i rëndë me armë zjarri ka tronditur plazhin Bondi në Australi gjatë festimeve të Hanukkahut, duke shkaktuar vdekjen e të paktën 15 personave dhe plagosjen e dhjetëra të tjerëve. Sipas autoriteteve, 42 persona ndodhen në spital nën kujdes mjekësor. Viktimat janë të moshave nga 10 deri në 87 vjeç.
Mes të ndjerëve është edhe një vajzë 10-vjeçare, dy rabinë izraelitë, një inxhinier francez, si dhe një i mbijetuar i Holokaustit. Ngjarja ka shkaktuar tronditje të thellë në komunitetin hebraik dhe më gjerë.
Një nga viktimat kryesore ishte rabini Eli Schlanger, drejtues i misionit Chabad në Bondi dhe organizator i festës. Ai la pas bashkëshorten dhe pesë fëmijë të mitur. Schlanger njihej për angazhimin e tij në rritjen e sigurisë komunitare, veçanërisht pas shtimit të incidenteve antisemitike në Australi.
Ndër viktimat është edhe 87-vjeçari Alex Kleitman, i mbijetuar i Holokaustit nga Ukraina, i cili u qëllua ndërsa përpiqej të mbronte bashkëshorten e tij, Larisa. Çifti kishte festuar së bashku Hanukkahun pas 50 vitesh martesë.
Autoritetet franceze konfirmuan gjithashtu vrasjen e Dan Elkayim, një inxhinier francez që kishte emigruar në Sydney vetëm një vit më parë. Ministri i Jashtëm i Francës e cilësoi sulmin si një manifestim tragjik të antisemitizmit.
Në mesin e viktimave përfshihen edhe rabini Yaakov Halevi Levitin dhe Reuven Morrison, anëtar i komunitetit hebraik të Sidneit. Hetimet për zbardhjen e plotë të ngjarjes vijojnë.
