Shiko videon këtu!
Uji i ndotur vijon të rrjedhë nga rubinetat e banesave në Tiranë, pavarësisht se problemi është bërë publik prej disa ditësh. Në një video të shpërndarë nga faqja në Facebook “Lolita”, duket qartë se situata mbetet e pandryshuar. Filtrat e pallateve tregojnë qartë se uji vjen i ndotur, çka përbën rrezik për shëndetin e banorëve që e përdorin për konsum të përditshëm, duke paguar për një shërbim që nuk i përmbush standardet.
Megjithëse Krimi Ekonomik ka nisur një hetim në terren për këtë rast, problemi nuk është zgjidhur ende. Dyshohet për një çarje në tubacionin nëntokësor në rrugën “Shaban Karaj”, e shkaktuar nga amortizimi i linjës së furnizimit. Për këtë çështje është marrë në pyetje Dorjan Korbeci, Drejtor i Departamentit të Prodhimit dhe Shpërndarjes, i cili ka sqaruar se dëmtimi ka sjellë turbullimin e ujit që furnizon zonën.
Përveç hetimit të nisur nga Krimi Ekonomik, rasti pritet të merret në shqyrtim edhe nga SPAK, pas një kallëzimi penal të bërë nga gazetari Arsen Rusta. Ai ka kallëzuar penalisht Skerdi Drenovën, kreun e UKT-së, dhe Anuela Ristanin, Drejtuese e Komanduar në Bashkinë e Tiranës. Akuza përfshijnë shpërdorim detyre, ndotje të ujit, krime kundër njerëzimit dhe kryerje të veprave penale në bashkëpunim.
