Komisioni Qendror i Zgjedhjeve në Kosovë po vazhdon numërimin e votave me postë për zgjedhjet parlamentare të 9 shkurtit. Sipas të dhënave të deritanishme ku janë numëruar vetëm 14.36% e votave, Lëvizja Vetëvendosje kryeson me 2.669 vota (44.33%), më pas vjen Lidhja Demokratike e Kosovës me 2.020 vota (33.55%), pasuar nga koalicioni Aleanca për Ardhmërinë e Kosovës, Nisma Socialdemokrate, Konservatorët e Intelektualët me 583 vota (9.68%).
Për këto zgjedhje, qytetarët e Kosovës që jetojnë jashtë vendit kanë mundur të votojnë në dy mënyra: përmes postës dhe votimit fizik në disa përfaqësi diplomatike të Kosovës.
Numërimi i votave me postë nisi më 28 shkurt, teksa numërimi i votave nga përfaqësitë diplomatike të Kosovës është drejt fundit. KQZ-ja ka thënë se ka aprovuar më shumë se 63.000 pako, që supozohet se janë me fletëvotime.
Ndërkohë, përveç votave të diasporës, pa numëruar kanë mbetur edhe votat me kusht dhe votat e personave me nevoja të veçanta.
