Një traget me afro 300 pasagjerë është përfshirë nga flakët në ujërat pranë Sulawesit Juglindor në Indonezi, duke shkaktuar një bilanc tragjik me të paktën pesë viktima dhe shumë persona të zhdukur.
Ngjarja e rëndë ndodhi gjatë lundrimit nga qyteti portual Kendari drejt Makassarit, kur papritur në bord shpërthyen flakët, duke përhapur panik në mesin e pasagjerëve. Pamjet dhe dëshmitë tregojnë për skena kaosi, me njerëz që hidhnin jelekët e shpëtimit dhe kërkonin ndihmë në det të hapur.
Sipas zëvendësadmiralit Denih Hendrata, komandant i Flotës indoneziane, në operacionin e shpëtimit u përfshinë tre anije luftarake. Deri në këto momente janë shpëtuar 284 persona, përfshirë pasagjerë dhe anëtarë të ekuipazhit.
Agjencia Associated Press raporton se mes viktimave është edhe një grua shtatzënë, ndërsa autoritetet lokale druhen se numri i të vdekurve mund të rritet, pasi disa persona konsiderohen ende të zhdukur.
Shkaku i shpërthimit të zjarrit nuk është bërë ende i ditur, ndërkohë që po vijojnë hetimet dhe operacionet e kërkim-shpëtimit në zonë.
