Franca ka vendosur të angazhojë forcat e saj të armatosura për të përshpejtuar fushatën kombëtare të vaksinimit të lopëve, pas përhapjes së sëmundjes “lumpy skin” në disa rajone të vendit.
Qeveria synon të mbrojë rreth 750 mijë krerë bagëti, ndërsa shpërthimi i sëmundjes po ushtron presion të madh mbi fermerët dhe shërbimet veterinare.
Vendimi vjen pas kërkesës së Kryeministrit Sébastien Lecornu për të forcuar përpjekjet civile në menaxhimin e krizës. Që prej 20 dhjetorit, Shërbimi Shëndetësor i Forcave të Armatosura ka nisur bashkëpunimin me agjencitë shtetërore dhe fermerët në zonat e prekura.
Sipas të dhënave zyrtare, në departamentin Ariège është vaksinuar gati gjysma e lopëve, në Aude mbi 70 për qind, ndërsa në Pyrénées-Orientales është arritur mbulim i plotë i vaksinimit.
Autoritetet theksojnë se kjo fushatë është thelbësore për të frenuar përhapjen e virusit, i cili po dëmton rëndë sektorin e blegtorisë dhe shëndetin e kafshëve.
Angazhimi i forcave të armatosura konsiderohet një hap i domosdoshëm për të garantuar mbështetje të mjaftueshme për fermerët përballë kësaj situate.
Kriza ka nxitur gjithashtu debat mbi mënyrën e menaxhimit të emergjencave të tilla dhe rëndësinë e bashkëpunimit mes sektorit civil dhe atij ushtarak në përballjen me kërcënime ndaj shëndetit publik dhe blegtorisë.
Ekziston shqetësim se sëmundja mund të ketë pasoja të rënda ekonomike, duke rritur kostot për trajtimin dhe menaxhimin e bagëtive, si dhe duke ndikuar potencialisht në sigurinë ushqimore të vendit.
