Një turist në Kinë ka shpëtuar për mrekulli pasi ra nga një shkëmb rreth 40 metra i lartë ndërsa po përpiqej të bënte një selfie në parkun malor Huaying, në qytetin Guang’an.
Sipas një videoje të regjistruar nga një dëshmitar okular, turisti humbi ekuilibrin dhe u rrëzua në humnerë. Megjithëse përjetoi një tronditje të madhe dhe rrezik serioz për jetën, ai arriti të mbijetojë. Më vonë, në një postim në rrjetet sociale, ai tha se ndiente sikur “e kishin ndihmuar perënditë e malit”.
“Rashë nga një shkëmb 40 metra i lartë dhe u rrokullisa për rreth 15 metra. Kur gurët u shembën nën këmbët e mia, mendova se do të vdisja. Është e mrekullueshme që jam gjallë”, shkroi ai.
Videoja e rënies së tij është bërë virale gjatë 24 orëve të fundit. Megjithatë, një përfaqësues i parkut natyror deklaroi dje (8/12/25) për gazetën Mirror se nuk ishte marrë asnjë njoftim zyrtar për një incident të tillë.
Zona ku dyshohet se ndodhi aksidenti, e njohur si “Shkëmbi-thikë”, nuk ndodhet brenda hapësirës turistike të administruar nga parku. Përfaqësuesi theksoi se në atë vend lejohet vetëm vëzhgimi nga distanca dhe ndalohet rreptësisht ngjitja. Ai u bëri thirrje vizitorëve të respektojnë rregullat e parkut dhe të shmangin hyrjen në zona të mbyllura ose të rrezikshme gjatë ecjes malore.
