Policia e Tiranës ka finalizuar me sukses operacionin policor të koduar “The Arsonist”, duke zbardhur rastin e djegies së qëllimshme të një automjeti në kryeqytet.
Pas njoftimit se më datë 3 shtator 2025, rreth orës 23:50, në rrugën “Frang Bardhi” ishte përfshirë nga flakët një automjet tip Citroen, në pronësi të një 43-vjeçareje, shërbimet e Komisariatit të Policisë Nr. 2 nisën menjëherë hetimet për identifikimin e autorit.
Si rezultat i veprimeve të shpejta hetimore dhe operative, u bë e mundur arrestimi i shtetasit D. B., 34 vjeç, banues në Tiranë, i cili dyshohet se për motive të dobëta dogji automjetin.
Materialet procedurale i janë referuar Prokurorisë pranë Gjykatës së Rrethit Gjyqësor Tiranë, ku ai do të përballet me akuzën për veprën penale “Shkatërrimi i pronës me zjarr”.
