Kryeministri Edi Rama po mban këtë të mërkurë takimin e fitores në sheshin “Skëndërbej”.
Rama renditi premtimet që do të mbajë gjatë mandatit të katërt, duke nënvizuar se do të rriten të ardhurat për frymë, do të rritet paga mesatare si dhe do të rriten pensionet.
Rama shtoi se ky mandat i katërt është për një Shqipëri të re, duke theksuar se shkollat do të jenë me nivele më të larta sigurie, spitale më modern dhe një turizëm më i zhvilluar.
Rama: Me Europën për Shqipërinë dhe me Shqipërinë për Europën. Ky është një mandat për t’u bërë një me europianët. Ky është një mandat për të mbajtur barazinë para ligjit, sa mos ta luaj më topi, ku fantazmat e pandëshkueshmërisë nuk do të gjejnë më vend. Ky është një mandat që shqiptarët na e besuan ne. Shqiptarët e dine, vetëm ne dhe askush tjetër mund ta udhëheqim Shqipërinë pa humbur busullën dhe ritmin.
Do bëjmë çmos për të qenë më të bashkuar për fatin që na ka ardhur në dorë. Na takon ne t’i japim dorë popullit të dorës së dytë. Askush të mos e shohë më shqiptarin si të huaj, por të jenë të barabartë. Ky është një mandat për një Shqipëri të re. Do të rrisim prodhimin kombëtar. Do t’i rrisim të ardhurat për frymë. Do ta rrisim pagën mesatare në të paktën 1200 euro. Do të rrisim pagën e përgjithshme mesatare.
Ky është një mandat që do t’i jemi më pranë pensionistëve. Pagën minimale do ta ngremë nga janari i vitit 2026 në 500 euro. Në Shqipërinë e vitit 2030, paga minimale do të jetë të paktën 650 euro.
Ky është një mandat për Shqipërinë me një nivel ende më të lartë sigurie, me shkolla të mbuluara me kamera inteligjente. Ky është një mandat për Shqipërinë me një spital ultra modern në zonën e Durrësit. Ky është një mandat për Shqipërinë me shërbime ende më moderne, me arsim më të zhvilluar digjital. Ky është një mandat për Shqipërinë me korridorin blu dhe korridorin e 8, me porte turistike në operim, me katër aeroporte.
Bëjmë me dije se PS kryesoi në zgjedhjet e 11 majit, duke “rrëmbyer” deri më tani 83 mandate, e duke lënë pas PD-ASHM me 50 mandate, teksa nënvizojmë se është duke vijuar ende procesi i numërimit për votat e diasporës.
