Aktorja e re Sophie Nyweide, e njohur për rolin e saj në filmin Mammoth (2009), ka ndërruar jetë më 14 prill në moshën 24-vjeçare.
Ajo kishte aktruar në disa filma që në fëmijëri, përfshirë Margot at the Wedding, An Invisible Sign dhe Noah.
Familja e saj nuk ka zbuluar qartë shkaqet e vdekjes, por në deklaratën e tyre përmendet lufta e saj me probleme të thella emocionale dhe psikologjike, të cilat përpiqej t’i përballonte vetëm, duke refuzuar ndihmën profesionale.
Në njoftim thuhet se Sophie ishte një shpirt i ndjeshëm dhe krijues, që gjente qetësi vetëm në xhirimet e filmave, ndërsa pasionin për aktrimin e kishte zhvilluar që në moshë të vogël, e frymëzuar nga nëna e saj – ish-aktore dhe pronare e një kinemaje. Vdekja e saj ka lënë një boshllëk të madh për të afërmit dhe miqtë, të cilët e përshkruajnë si të talentuar, të dashur dhe me një thellësi emocionale të rrallë.
