Mbrëmjen e sotme, banorët e fshatit Çiflik organizuan një protestë për shkak të përmbytjeve që prekin vazhdimisht zonën, të cilat ata i përshkruajnë si rezultat i bllokimit të kanalit kullues nga bashkia. Sipas tyre, ky problem ka zgjatur për më shumë se një muaj, duke shkaktuar përmbytje të shumta në tokat dhe banesat e tyre, dy herë në dy muaj.
Banorët e fshatit theksojnë se ngushtimi i kanalit nga ana e autoriteteve lokale ka kontribuar në rritjen e frekuencës së përmbytjeve. Një banore shprehet: “Kanali është bllokuar. Nuk e di sesi erdhi uji, por fshati u mbyt. Nuk ka përgjigje nga askush.” Një banor tjetër shton se dëshiron që të hiqet betoni që ka bllokuar rrjedhën e ujit dhe kërkon hapjen e urës për të lejuar rrjedhjen e ujit, ndryshe, ai shpreh shqetësimin se shtëpia e tij dhe serra janë dëmtuar.
Një banor në moshë të avancuar pohon se për 70 vite nuk ka parë diçka të tillë dhe kritikon punën e bashkisë për bllokimin e lumit. Ai rrëfen se djali i tij është kthyer nga Italia për të punuar, por tani gjithçka është shkatërruar për shkak të kësaj situate. Disa nga banorët diskutuan edhe mundësinë e vetëgjyqësisë nëse situata vazhdon pa zgjidhje.
Çiflikasit i bëjnë thirrje bashkisë për të marrë masa të menjëhershme, pasi nivelet e prurjeve të lumit dhe përrenjve po vazhdojnë të rriten, duke rrezikuar edhe më shumë pronat dhe jetën e tyre. Protesta ka për qëllim të sjellë vëmendjen mbi një problem të vazhdueshëm dhe për të kërkuar një zgjidhje, duke u shprehur se nuk duan vetëm ndihmë, por kërkojnë hapjen e kanaleve të mbyllura për të frenuar përmbytjet.
