Asosacioni i Gazetarëve të Shqipërisë, ka reaguar lidhur me vendimin e qeverisë për mbylljen e rrjetit social TikTok.
AGSh e konsideron këtë vendim si masë ekstreme, pavarësisht se thekson se gjuha e urrejtjes dhe bullizmit jan shqetësuese në Shqipëri.
Organizata e gazetarëve thotë ndër të tjera se vendimi është i rrezikshëm dhe i pajustifikueshëm.
Reagimi i plotë i AGSh:
Mbyllja e tërësishme e rrjeteve sociale për popullatën e gjerë është një masë ekstreme nga ana e qeverisë.
Asociacioni i Gazetarëve të Shqipërisë u njoh sot me vendimin e qeverisë së kryeministrit Edi Rama për të mbyllur tërësisht rrjetin social “TikTok”.
Që në krye të herës, AGSH dëshiron të theksojë se situata e gjuhës së urrejtjes, dhunës online dhe bullizmit nëpër rrjetet sociale është tepër shqetësuese në vendin tonë. Por rruga më e shkurtër, ajo e mbylljes totale të rrjeteve sociale, jo vetëm që nuk është zgjidhje, por na rreshton me regjime diktatoriale.
Mediat sociale sot janë mjete të lirisë së shprehjes, sidomos në vendet si i yni, ku hapësirat për lirinë e shprehjes janë mjaft të kufizuara.
Precedenti i mbylljes së një rrjeti social është i rrezikshëm dhe i pajustifikuar, që mund të çojë qeverinë në mbylljen e platformave të tjera të ngjashme.
Gjykata Europiane e të Drejtave të Njeriut njeh kufizime, por e ka gjetur në shkelje të Konventës Europiane për të Drejtat e Njeriut mbylljen totale të platformave online.
Ndaj, AGSH i bën thirrje qeverisë, sa nuk është vonë, të rishikojë vendimin e saj për mbylljen totale të platformës.
Paraprakisht, ne jemi të vendosur që, nëse nuk ka një tërheqje nga ana e qeverisë, të vijojmë diskutimet me partnerët për ta sfiduar ligjërisht këtë vendim sapo ai të marrë formë ligjore.
