Ndërsa shqetësimet mbi sigurinë e fëmijëve në internet po marrin gjithnjë e më shumë vëmendje në mbarë Evropën, vendet anëtare të Bashkimit Evropian po intensifikojnë përpjekjet për të vendosur udhëzime më të rrepta mbi verifikimin e moshës, raportoi agjencia Ansa.
Këto përpjekje përfshijnë nisjen e projekteve pilot për teknologjinë e verifikimit të moshës në nivel kombëtar dhe diskutime të vazhdueshme mbi mënyrat më efektive për zbatimin e këtyre rregulloreve.
Franca, Spanja dhe disa vende të tjera kanë shprehur mbështetje për një propozim që synon të ndalojë plotësisht qasjen e fëmijëve nën një moshë të caktuar në platformat e mediave sociale – përkatësisht, 15 vjeç në shumicën e vendeve dhe 16 vjeç në Spanjë.
Përkrahësit e kësaj mase theksojnë rezultatet e studimeve që tregojnë një lidhje ndërmjet përdorimit të mediave sociale dhe problemeve të tilla si ankthi, depresioni, vetëvlerësimi i ulët, bullizmi në internet dhe rreziku nga grabitqarët online.
Aktualisht, shumica e platformave si Facebook, Instagram dhe TikTok lejojnë krijimin e një llogarie nga mosha 13 vjeç, por shumë fëmijë i shmangin këto kufizime duke deklaruar një moshë të rreme.
Një zëdhënës i Komisionit Evropian deklaroi muajin e kaluar se BE-ja nuk planifikon një ndalim të përgjithshëm të aksesit në rrjetet sociale në nivel të Unionit, por u ka lënë shteteve anëtare mundësinë për të miratuar masa të veçanta ligjore sipas nevojave të tyre.
