Kryetari i Bashkisë së Tiranës, Erion Veliaj, ka uruar të gjithë fëmijët me rastin e 1 Qershorit – Ditës Ndërkombëtare të Fëmijëve, duke rikujtuar përkushtimin e Bashkisë në krijimin e hapësirave për më të vegjlit e qytetit.
Në një postim në rrjete sociale, Veliaj ndau edhe një kujtim simbolik nga viti 2015, kur u përurua këndi i lodrave te Parku i Liqenit, si një dhuratë për fëmijët në Ditën e Tyre.
“Si sot, 9 vjet më parë, këndi i lodrave te Parku i Liqenit ishte dhurata e 1 Qershorit për fëmijët e Tiranës. Prej asaj dite nuk kemi rreshtur një ditë së punuari për ta”, shkroi Veliaj.
Ai theksoi se në këto vite janë ndërtuar dhjetëra kënde lojërash, si dhe çerdhe, kopshte dhe shkolla të reja, bashkë me hapësira të gjelbra e terrene sportive në çdo lagje të qytetit.
“Për disa prej tyre na është dashur të përballemi me debate e vendime të vështira, por të drejta: të ecnim përpara. Për fëmijët e Tiranës, për dritën e syve të çdo prindi, ia vlejti”, shtoi Veliaj, duke përfunduar me urimin:
“Gëzuar 1 Qershorin, kalamaja!”
