Çështja e vdekjes tragjike të Davide Astorit, ish-kapitenit të Fiorentinës, po merr një kthesë të re ligjore pas një vendimi të Gjykatës së Firences. Spitali Careggi është urdhëruar të paguajë një kompensim prej rreth 1.1 milion euro për familjen e futbollistit, i cili humbi jetën më 4 mars 2018, për shkak të një ataku kardiak, vetëm disa orë para ndeshjes së kampionatit kundër Udineses. Ky shpërblim do t’iu jepet partneres së tij Francesca Fioretti, vajzës Vittoria, si dhe prindërve dhe vëllezërve të tij.
Vendimi i Gjykatës së Firences është shoqëruar nga miratimi i Gjykatës së Kasacionit, e cila ka përcaktuar përgjegjësinë civile të spitalit për incidentin tragjik. Në qendër të hetimeve është Profesor Giorgio Galanti, mjeku që kreu ekzaminimet shëndetësore të Astorit, i cili u dënua me një vit burgim me kusht për vrasje të paqëllimshme. Gjyqtarët konstatuan se ai kishte dështuar në interpretimin e duhur të disa anomali gjatë një testi stresi, që do të kishin kërkuar hetime të mëtejshme dhe potencialisht do të kishin shpëtuar jetën e futbollistit.
Sipas ligjit, kompensimi duhet të paguhet nga institucioni shëndetësor në të cilin punonte mjeku. Kjo i jep përgjegjësinë Careggi për pagesën e shumës së vendosur. Megjithatë, në një fazë të mëvonshme, mund të shqyrtohet një kërkesë për ankim ndaj mjekut në rast se konstatohet neglizhencë e rëndë, me mundësinë e ndërhyrjes nga Gjykata e Auditorëve dhe sigurimit të personelit shëndetësor.
Astori u gjet i vdekur në hotelin ku Fiorentina po qëndronte para ndeshjes kundër Udineses. Autopsia konfirmoi se ai kishte ndërruar jetë për shkak të një ataku kardiak të papritur. Ky rast trishtues shkaktoi shtyrjen e ndeshjeve të Serie A dhe disa ndeshjeve në Serie B dhe C në shenjë zie. Pas vdekjes së tij, Fiorentina dhe Cagliari vendosën të tërhiqnin fanellën me numrin 13, në nder të Astorit dhe në kujtim të një prej figurave më të mëdha të futbollit italian.
