Kur kanë kaluar dy vite nga vdekja e 3-vjeçarit Brian Spahiu në klinikën dentare ‘Splendent’ në Tiranë, Prokuroria e Tiranës ka lëshuar 3 masa sigurie.
Masat janë për mjekun anestezist Roland Xhaxho, vajzën e tij Ina Xhaxho dhe për Marta Ginën.
Mësohet se masat e sigurisë janë caktuar nga Gjykata e Tiranës “arrest shtëpie” për të tre.
3-vjeçari humbi jetën më 1 tetor 2023 në klinikën ‘Splendent’ ku iu nënshtrua një ndërhyrje të vështirë kirurgjikale në 14 dhëmbë.
Brian Spahiu iu nënshtrua ndërhyrjes më 28 shtator 2023 në klinikën e mjekes Ina Xhaxho. I mituri humbi jetën 3 ditë më vonë pasi kisht dalë nga spitali.
Lidhur me këtë ngjarje të rëndë, Prokuroria e Tiranës nisi hetimet në atë kohë për veprat penale mjekim i pakujdesshëm dhe neglizhencë në trajtim mjekësor.
Masat e sigurisë u dhanë nga Gjykata e Tiranës pas ardhjes së përgjigjes së akt-ekspertizës nga Italia, për përcaktimin e shkakut të vdekjes. Prokurorja e çështjes, Alma Felaj, kishte kërkuar ekspertë të huaj për të kryer ekspertizën që do të përcaktonte shkakun e vdekjes së 3-vjeçarit, i cili ndërroi jetë pas ndërhyrjes dentare në klinikën private.
Dyshohet se 3-vjeçarit iu injektua dozë e lartë narkoze në klinikën dentare. Pas ndërhyrjes, fëmija nuk u zgjua. Mjeku u tha prindërve ta merrnin djalin dhe se do të zgjohej në banesë. Por as aty nuk reagoi. 3-vjeçari u dërgua nga prindërit në Pediatri dhe qëndroi për 2 ditë në koma, ku më pas fatkeqësisht humbi jetën.
