Seanca konstituive e Kuvendit të Kosovës ka dështuar për herë të 26-të.
Kryesuesi i seancës, Avni Dehari hodhi në votim formimin e Komisionit për mbikëqyrjen e votimit të fshehtë për zgjedhjen e kryetarit të Kuvendit.
Nga 111 deputetë të pranishëm në sallë, 53 votuan pro, një kundër dhe nuk pati asnjë abstenim.
Përpara votimit, Dehari ftoi përfaqësuesit e partive politike për një konsultë të shkurtër, por pa arritur ndonjë marrëveshje.
Që prej 1 majit, kandidatura e propozuar nga Vetëvendosje për postin e kryeparlamentares, Albulena Haxhiu, ka dështuar të sigurojë shumicën e nevojshme të votave.
Deri më tani, deputetët kanë kaluar vetëm dy pika të agjendës së seancës konstituive: raportin e Komisionit të përkohshëm për verifikimin e mandateve dhe atë të betimit të deputetëve.
Ndërsa mes thirrjeve për themelim të instucineve si brenda Kosovës dhe jashtë saj, Kuvendi i Kosovës po mblidhet çdo 48 orë pa ndonjë rezultat.
Seanca e radhës është parashikuar të mbahet më 5 qershor.
