Dy tërmete me magnitudë 4.7 dhe 4.5 ballë të shkallës Rihter kanë goditur mbrëmjen e sotme zonën e Santorinit në Greqi, me një distancë prej disa minutash mes tyre, duke ngritur alarm për mundësinë e një goditjeje edhe më të fortë.
Sipas Institutit Gjeodinamik, tërmeti i parë, me magnitudë 4.7, ka ndodhur në juglindje të Arkesinit, në ishullin e Amorgos, në një thellësi prej 14.9 km. I dyti, me magnitudë 4.5, ka pasuar në të njëjtën zonë, në një thellësi prej 13 km.
Në këtë situatë, autoritetet greke kanë marrë masa të menjëhershme dhe kanë paralajmëruar banorët e Santorinit që të shmangin grumbullimet në ambiente të mbyllura, të mos qëndrojnë në ndërtesa të vjetra dhe të qëndrojnë të qetë në rast të lëkundjeve sizmike.
Mobilizimi i autoriteteve është bërë i nevojshëm pas më shumë se 200 lëkundjeve sizmike që janë regjistruar në 48 orët e fundit, duke shkaktuar panik midis qytetarëve, autoriteteve dhe shkencëtarëve. Epiqendra e këtyre lëkundjeve ka qenë kryesisht zona e Anhidros, një ishull i pabanuar pranë Santorinit, një fakt që ka ngritur shqetësime të mëtejshme.
Një nga masat më të rëndësishme të rekomanduara nga ekspertët është evakuimi. Bashkia e Santorinit ka vendosur çadra në ambiente të hapura për qytetarët, duke ofruar një mundësi sigurie gjatë kësaj periudhe të pasigurtë.
