Real Madrid arriti një fitore të madhe 3-0 ndaj Manchester City në ndeshjen e parë të fazës së 1/8-ave të UEFA Champions League, në një mbrëmje plot emocione në stadiumin Santiago Bernabéu. Heroi absolut i sfidës ishte Federico Valverde, i cili realizoi një “hat-trick” spektakolar për të udhëhequr madrilenët drejt një fitoreje të madhe.
Reali hyri në këtë ndeshje me shumë mungesa dhe me shpresën për të fituar kohë deri në rikthimin e lojtarëve të dëmtuar, përfshirë Kylian Mbappé. Megjithatë, skuadra e drejtuar nga Álvaro Arbeloa tregoi karakter dhe luftoi me zemër për të arritur një rezultat që pak kush e priste.
Goli që ndryshoi ndeshjen
Pas një fillimi të kujdesshëm, momenti vendimtar erdhi kur portieri Thibaut Courtois dërgoi një top të gjatë drejt Valverdes. Mesfushori uruguaian u nis nga gjysma e fushës, kaloi mbrojtjen e Cityt dhe, pasi shmangu edhe portierin Gianluigi Donnarumma, dërgoi topin në rrjetë për 1-0.
Ky gol i dha besim Realit, i cili arriti të shënojë sërish pak më vonë. Pas një aksioni të bukur ofensiv, Vinícius Júniorasistoi në zonë dhe sërish Valverde u gjend në vendin e duhur për të dërguar topin në rrjetë për 2-0.
Hat-trick i paharrueshëm
Në fundin e pjesës së parë erdhi edhe momenti më spektakolar i ndeshjes. Pas një topi të hedhur në zonë nga Brahim Díaz, Valverde realizoi një lëvizje teknike të bukur duke kaluar mbrojtjen dhe më pas shënoi golin e tretë, duke kompletuar një “hat-trick” historik.
City pati disa mundësi për të reaguar, ndërsa Reali mund të kishte shënuar edhe më shumë. Vinícius Júnior fitoi një penallti pas një ndërhyrjeje të Donnarummas, por goditja e tij nga pika e bardhë u prit nga portieri italian.
Në fund, madrilenët mbrojtën me kujdes avantazhin dhe siguruan një fitore të madhe që i jep një avantazh të rëndësishëm para ndeshjes së kthimit në Angli.
Një mbrëmje e paharrueshme në “Bernabéu”, ku Reali tregoi edhe një herë pse konsiderohet skuadra më legjendare në historinë e Champions League.
