Vllaznia në futbollin e vajzave ka përfunduar rrugëtimin e saj në Champions League pas një humbjeje 1-2 ndaj kampioneve të Bjellorusisë, Dinamo Minsk, në turin e dytë të kompeticionit. Kjo disfatë i ka mohuar vajzave kuqeblu mundësinë për të luajtur në finalen e këtij turi.
Pavarësisht një merkatoje të fuqishme me plot 11 përforcime, skuadra shkodrane nuk arriti të kalojë një kundërshtar të fortë si Dinamo Minsk. Mungesa e sulmueses kryesore Megi Doçi, e pezulluar për shkak të një kartoni të kuq nga sezoni i kaluar, ndikoi dukshëm në performancën e ekipit.
Skuadra bjelloruse kaloi në avantazh në fund të pjesës së parë me golin e Tikhomirova-s, ndërsa në fillim të pjesës së dytë shënoi edhe golin e dytë, duke vështirësuar më tej situatën për Vllazninë. Reagimi i vajzave shqiptare erdhi vonë, me një gol të Bajraktarit në fund të ndeshjes, por presioni i ushtruar në minutat e mbetura nuk mjaftoi për të çuar takimin në shtesë.
Pas ndeshjes, trajneri Nikolin Lekaj shprehu keqardhjen për eliminimin, duke theksuar se ishte një rezultat zhgënjyes për ekipin dhe për pritshmëritë që kishin.
Megjithatë, aventura evropiane për Vllazninë nuk ka përfunduar ende. Skuadra do të ketë edhe një shans të fundit për të siguruar vendin e tretë në këtë minigrup, përballë Racing Union, dhe për të vijuar garimin në Europa League.
Finalja e këtij turi do të zhvillohet mes Ferencvarosh, që triumfoi 3-0 ndaj Racing Union, dhe Dinamo Minsk, që eliminoi Vllazninë me rezultatin 2-1.
