Ukraina ka realizuar një sulm masiv të martën, duke goditur disa objekte të rëndësishme brenda territorit të Rusisë, duke e konsideruar këtë si sulmin më të madh të luftës deri më tani. Sipas informacioneve të Shtabit të Përgjithshëm të Forcave të Armatosura të Ukrainës, sulmet goditën depo municionesh dhe fabrikat kimike në disa rajone të largëta, disa prej të cilave ishin më shumë se 500 kilometra larg kufirit ukrainas.
Burime nga agjencia e inteligjencës e Ukrainës, SBU, e përshkruan këtë sulm si një “goditje të dhimbshme” për mundësitë luftarake të Rusisë, duke theksuar se ky veprim dëmton aftësinë e shtetit rus për të vazhduar operacionet ushtarake.
Nga ana tjetër, Rusia ka reaguar duke njoftuar se ka rrëzuar raketat Atacms të dërguara nga Shtetet e Bashkuara të Amerikës, si dhe raketat lundruese Storm Shadow të prodhuara në Britani. Autoritetet ruse gjithashtu janë shprehur se do të hakmerren për këtë sulm.
Të paktën nëntë aeroporte në rajonet qendrore dhe perëndimore të Rusisë ndaluan përkohësisht operacionet ajrore pas sulmeve, ndërsa shkollat në rajonin e Saratovit, në jugperëndim, u mbyllën dhe kaluan në mësim online për shkak të dëmeve të shkaktuara.
Në rajonin kufitar të Bryansk, sulmet shpërthyen një rafineri nafte dhe disa depo municionesh, ndërsa një fabrikë kimike që dyshohet se prodhonte barut dhe eksplozivë pësoi dëme të mëdha, sipas burimeve të sigurisë ukrainase.
Shtabi i Përgjithshëm i Ushtrisë së Ukrainës gjithashtu ka njoftuar se ka goditur objektiva deri në 1,100 km larg kufirit ukrainas, duke shënuar një intensifikim të sulmeve të thella brenda territorit rus.
Kjo goditje masive vjen pas një sulmi të mëparshëm të Ukrainës mbi një depo nafte në Engels, i cili kishte shkaktuar një zjarr të madh dhe shpalljen e një gjendjeje emergjente në rajon.
