Adriatik Lapaj është rikthyer në “vendbanimin” e tij tashmë që prej 8 dhjetorit, në trotuarin poshtë shkallëve të kryeministrisë. Ai u zhvendos për 2 orë në trotuarin përballë së bashku me një grup personash, për t’i liruar vend protestuesëve të Berishës, të cilët sot organizuan një tubim me qëllim për të rrëzuar qeverinë e Edi Ramës.
Berisha i bëri thirrje dhe live duke ftuar të gjithë opozitarët për tu bashkuar, por kjo duket se është refuzuar nga Lapaj, i cili si kërkesë të vetme ka heqjen e logove dhe protestimin si qytetarë të lirë vetëm për interesat e shqiptarëve.
Adriatik Lapaj tha se “regjimi nuk mundet me kapsolla” por vetëm përmes qëndresës dhe rezistencës së vazhdueshme qytetare. Ai iu referuara disa molotovëve të hedhura në drejtim të kryeministrisë në sekondën e parë që Berisha mbaroi fjalën e tij. Kjo ishte revolta më e madhe e regjistruar në këtë protestë, shto këtu dhe tërheqjen e gardhit metalik që ndante protestuesit me policinë.
“Ne kemi një armik të përbashkët të Republikës, që është Edi Rama. Mund të kemi mendime dhe ngjyra të ndryshme politike, por kemi një hall të përbashkët. Shqipëria është marrë peng dhe vetëm të bashkuar mund ta ndryshojmë historinë”, tha ai.
Vetë Lapaj, për të rrëzuar qeverinë e Edi Ramës ka zgjedhur metodën paqësore, duke qëndruar pa pushim poshtë zyrës së kryeministrit pa ndalim. Lapaj është një tjetër kamp opozitar që proteston i pavarur, ashtu si dhe Berisha, Arlind Qori apo dhe Agron Shehaj, qëllimi është i përbashkët, por së bashku nuk kanë rënë dakord në asnjë moment për tu bashkuar.
