Një tragjedi ka ndodhur në Itali, ku një vajzë 13-vjeçare shqiptare ka ndërruar jetë pas gjashtë ditësh në koma, pas një aksidenti të rëndë automobilistik.
Ngjarja ka ndodhur mbrëmjen e 10 janarit, në zonën e Abbadia Lariana, kur Jennifer (Xheni) Alcani, e cila ndodhej në një BMW, u përfshi në një përplasje të tmerrshme. Aksidenti ka ndodhur pak para orës 5 të mëngjesit, pranë hyrjes në Rrugën Shtetërore 36, që lidh Lecco-n.
Xheni dhe dy të rinjtë e tjerë, një 22-vjeçar që drejtonte makinën dhe një 19-vjeçar nga Malgrate, ishin duke e çuar vajzën në shtëpi pasi kishin kaluar së bashku një mbrëmje. Sipas hetimeve paraprake, makina duket se ka qenë duke ecur me shpejtësi të lartë, shumë më tepër se kufiri i lejuar prej 50 km/h, dhe kjo mund të ketë shkaktuar përplasjen fatale.
Dëshmi të shpejtësisë së lartë janë siguruar edhe nga një video e shpërndarë në TikTok, ku shfaqet BMW-ja duke kaluar me shpejtësi në një tunel, pak para aksidentit.
Pavarësisht përpjekjeve për të shpëtuar Xhenin, lëndimet ishin shumë të rënda dhe ajo nuk mundi t’i mbijetonte. Xheni, e cila jetonte në Lecco dhe do të kishte festuar 14-vjetorin e saj në prill, është ndarë nga jeta pas gjashtë ditësh në koma.
Ceremonia e saj mortore do të mbahet më 18 janar, në bazilikën qendrore të San Nicolò në Lecco. Ndërkohë, hetimet vazhdojnë për të sqaruar shkaqet e aksidentit.
