Një avion i kompanisë ajrore “Norwegian”, i nisur nga Tirana drejt Oslos këtë të enjte, është detyruar të bëjë një ulje emergjente në aeroportin e Splitit, Kroaci. Fluturimi DY1935 u devijua pasi u raportua për një xham të krisur në kabinën e pilotit dhe rënie të papritur të presionit në bord.
Sipas mediave kroate, të gjitha shërbimet emergjente ishin në gatishmëri gjatë uljes, ndërsa fatmirësisht nuk ka të lënduar mes pasagjerëve apo ekuipazhit.
Ky është incidenti i dytë brenda të njëjtës ditë me të njëjtin avion. Më herët në mëngjes, fluturimi DY1934 nga Oslo drejt Tiranës ishte detyruar të devijonte dhe të ulej në Berlin, për arsye që ende nuk janë bërë publike.
Autoritetet kanë nisur hetimet për të zbuluar shkaqet teknike dhe për të shqyrtuar masat e marra. Pasagjerët kanë shprehur shqetësim, ndërsa kompania “Norwegian” nuk ka reaguar ende zyrtarisht mbi incidentet e përsëritura me këtë avion.
