Altin Isaraj, vëllai i ish-deputetit të Partisë Socialiste dhe ish-drejtorit të Transportit Rrugor, Arben Isaraj, është gjetur i pajetë disa ditë më parë në banesën e prindërve të tij. Ai jetonte aty që kur ishte liruar nga burgu i Rrogozhinës. Ngjarja ka ndodhur në një kohë kur autoritetet po hetojnë rreth rrethanave të vdekjes së tij. Për momentin, nuk janë publikuar ende detaje të plota mbi shkakun e vdekjes, por hetimet janë duke u zhvilluar për të zbardhur ngjarjen.
Me anë të një postimi në rrjetet sociale, ish-deputeti i PS i ka dhënë lamtumirën e fundit vëllait të tij.
Sot, sipas asaj që doje dhe kërkove ti, po të përcjellim pranë nënës dhe babait.
Shumë motra dhe vëllezër, shokë dhe miq që ti i kishe pafund, do të donin të ishin pranë teje në këtë ditë për të të prekur me dorë, sy edhe lot.
Por, unë duke i mirëkuptuar dhe i falënderuar, duhet të vendosja atë që doje ti, sepse unë pas ikjes së prindërve, mbeta i vetmi në këtë botë që të preka, të putha dhe përqafova kur “erdhe” dhe “ike” prej saj.
Lamtumirë “o Labo”, i miri i të gjithëve dhe i keqi i vetes nga lindja deri në vdekje.
Lamtumirë o gjak që të kam në venat dhe zemrën time.
Më prit aty me Astritin dhe Violetën, se do të vij… dhe mos ma mbyll atë derë vëlla”, shkruan Arben Isaraj.
