Ish-polici i burgjeve, Gentjan Bejtja u vra më 15 mars në oborrin e shtëpisë përmes një atentati të mirëorganizuar në Larushkë të Fushë Krujës.
Bejtja u kishte shpëtuar tri atentateve, por i katërti ishte fatal për të. Teksa ndodhej në oborrin e banesës, persona të maskuar e qëlluan me breshëri plumbash.
Grupi hetimor ka marrë në pyetje edhe Armida Bejtjën, bashkëshorten e viktimës, e cila ka qenë dëshmitare e ngjarjes bashkë me fëmijët. Madje ajo ka deklaruar se një nga autorët i ka mbajtur të bllokuar atë dhe fëmijët dhe dy të tjerët kanë kryer vrasjen e bashkëshortit tësaj, Gentian Bejtja.
Armida Bejtja, bashkëshortja e viktimës: “Jam e martuar prej disa vitesh me Gentian Bejten dhe kemi tre fëmijë. Me 15 mars 2024, rreth orës 16:00, së bashku me bashkëshortin kemi dalë nga banesa e vjehrrit dhe kemi shkuar në banesën tonë, që ndodhet vetëm disa metra larg. Me vete kemi pasur edhe dy fëmijët.
Gjatë kohës që bashkëshorti ka qenë duke ujitur disa perime që kishte kultivuar në një serë pranë banesës, kam vënë re se kanë hyrë tre persona të armatosur. Njëri prej tyre më ka mbajtur të bllokuar mua dhe fëmijët, ndërsa dy personat e tjerë kanë qëlluar me armë automatike në drejtim të bashkëshortit duke i shkaktuar vdekjen e menjëhershme.”
Në lidhje me autorët e ngjarjes ajo jep një përshkrim të përgjithshëm por nuk mund të identifikojë asnjërin prej tyre. Gjithashtu, Armida Bejtja nuk ka ngritur dyshime apo të ketë sqaruar për ndonjë konflikt të bashkëshortit të saj.
